في هذا المقال بنعطيك 7 دروس مالية تعلمك وتنّورك من كتاب صار له قرن ومع كذا لسا صامل ونصايحه مفيدة!
صدر سنة 1926، كتاب “أغنى رجل في بابل” اللي يعتبر من كلاسيكيات المال الشخصي. الكتاب يتكلم عن قصة شخص اسمه أركاد ومراحل تحوله من شخص مستواه المادي عادي لأغنى رجل في مدينة بابل القديمة.
بداية فكرة الكتاب كانت عبارة عن كتيبات صغيرة فيها نصايح مالية تتوزع في البنوك وشركات التأمين، بعدين جمعوا هالكتيبات وطلع لنا الكتاب الكامل اللي موجود اليوم.
بنشاركك أسرار أركاد السبعة اللي ساعدته يكوّن ثروة عشان أنت بعد تكوّن ثروة وتوصل للمستوى المالي اللي تتمناه!. قراءة ممتعة
زي ما فيه دواء للمرض فيه دواء للجيب الفاضي! ومو دواء واحد، لا 7 أدوية لو مشيت عليها بتشافيك وتجنّبك تخلّص راتبك قبل نهاية الشهر. يلا نبدأ
الدرس الأول: فعّل الحصالة
في الدرس هذا بنرجعك لمرحلة الطفولة، أكيد كان عندك حصالة تجمّع فيها جزء من مصروفك اللي تاخذه من أهلك عشان تنبسط فيه نهاية الأسبوع مع أصحابك أو تجمّعها للمدى البعيد وتشتري سيكل. بعد ما كبرت أول درس بتطبقه على راتبك هو هذا. كل شهر حاول إنك تدخر 10% من راتبك وما تتنازل عنها، لأنك لو استثمرتها بترجع لك دبل وتنفعك لمستقبلك وتسندك وقت الزنقات.
الدرس الثاني: راقب مصاريفك
“اللي معهوش ميلزموش” الدرس هذا يقولك عيش على قد إمكانياتك ولا تفسفس فلوسك على رفاهيات وحاجات ثانوية ما تحتاجها، امش على هالقاعدة وخلك حكيم في صرفك. ومو معناه تبخل على نفسك! بس أعرف أولوياتك.
الدرس الثالث: استثمر للمرة الألف!!
الادخار لحالة عمره ما بيوصلك للمستوى المالي اللي تتمناه، اللهم بيحفظ فلوسك زي ماهي كأنه يجمدها وتذوبها متى ما احتجت. لكن الاستثمار يحميك من التضخم، ويخلي فلوسك تدّبل ولا تفقد قيمتها مع مرور الوقت.
اسمع كلام الجدات إذا قالوا لك “الذهب زينة وخزينة” تراها قاعدة استثمارية صحيحة 100%.تعلّم الاستثمار وخلّه مبدأ أساسي في حياتك لا تجمد فلوسك، شغلها! – اعرف أكثر.
الدرس الرابع: قلنا لك استثمر! لكن بذكاء
الدرس الرابع يعلّمك تحمي ثروتك اللي قاعد تبنيها وتتأكد إنك تستثمر فلوسك في الشيء الصح عشان تتجنب الخسارة. لازم تكون مركزّ وفاهم. ابحث عن نوع الاستثمار قبل ما تدخله وأعرف أدق التفاصيل عنه لو تبي تلعبها صح! وإذا مالك خلق وبالك مو طويل تقدر تستثمر في الصناديق المشتركة، ويكون معك خبير يصير هو المسؤول عن إدارة استثمارك. أهم نصيحة ممكن تتبعها إذا جيت تستثمر هي”لا تحط البيض كله في سلة وحدة” عشان تضمن أن استثماراتك متنوعة والمخاطر متوزعة على أصول مختلفة.
الدرس الخامس: خلّي بيتك استثمارك
في الدرس هذا ركزّ أركاد على مفهوم أساسي وعطانا نصيحة استثمارية. الديون عدو الثروة اللدود، قد ما تقدر تجنّبها أركاد ما كانت جايزتله فكرة أن الواحد يشتري بيت ويأجرة، زي ما أكثر ربعنا يسوون الحين. وعنده رأي مختلف تمامًا وينصحك تشتري بيت ويصير ملكك وتفتك من الإيجار، حتى لو كنت ملتزم بقسط البيت بالنهاية بيكون ملكك واستثمار للعمر الطويل.
الدرس السادس: سوي خطة باء
أكيد إنك ما بتداوم طول العمر! بيجي يوم وتتقاعد. خطط لهاليوم من الحين واضمّن لك دخل مستقبلي منتظم بدون مجهود زايد ( لأنك بتكون شايب)😆. فيه مصادر كثيرة للدخل السلبي زي تأجير العقارات، أو الاستثمار في الأسهم وغيرها…
الدرس السابع: طّور قدراتك
استثمارك في نفسك وتطوير مهاراتك هو أفضل شيء تقدمه لنفسك. لأنك كل ما تعلّمت كل ما عرفت “من أين تؤكل الكتف” دائمًا ابحث عن طرق تحسّن مهاراتك وتزيد معرفتك، عشان تقدر تزيد دخلك.
على أنها الدروس المالية السبعة سهلة في ظاهرها بس مفيدة وقوية لما تطبّقها. ولو مشيت على هالنصايح بتقدر تبنّي ثروة وتضمّن مستقبل مالي ممتاز. عشان تستفيد أكثر ننصحك تقرأ كتاب “أغنى رجل في بابل”.
