أول شي خلنا نعرف ايش هو”الدخل الاستثماري”. من اسمه بيكون دخل جايك من استثمار بدون ما تشتغل وتبذل مجهود مستمر عشان تطلّع أرباح، وإذا أنت مطفر وراتبك ما يكفيك وتدور على دخل إضافي هذا المقال مكتوب مخصوص عشانك بنعطيك فيه طرق وحلول عملية تساعدك تحقق أهدافك المالية وتعيش الحياة اللي تتمناها. خليك معنا وكمل للنهاية.
تأجير العقارات
“العقار الابن البار”. من هذي المقولة نقدر نقولك إن تأجير العقارات من أكثر طرق الدخل الاستثماري المطبقة على مدار السنين، لأنه يعطي صاحبه دخل منتظم ومتزايد مع ارتفاع سعره.
مثال : مستثمر عنده عقار ومأجره، المستثمر في الحاله هذي يستلم الإيجار بدون ما يشتغل كل اللي عليه يسوي صيانة دورية فقط.
توزيعات الأرباح
أول شي لازم تعرفه أن الفلوس اللي تجيك من توزيع أرباح الأسهم هي نتيجة نجاح الشركة ونموها، والأرباح اللي يوزعونها بتكون مصدر دخل استثماري ممتاز لك. المهم إنك تختار السهم الصح والشركة اللي بتنمي فيها رأس المال يكون أساسها قوي وتقييمها منطقي وما تنغر بنسبة الأرباح اللي بيعطونك ياها بس!
وديعة المُرابحة
المُرابحة بمفهومها البسيط هو أن إنك تودع فلوسك في البنك لمدة محددة، والبنك يشغلها لك، بعدين يبيعها بهامش ربح مضمون ومتفقين على قيمته من البداية. ثم يرجع لك المبلغ الأساسي للوديعة + هامش الربح. وكل هذا يتم بدون فائدة، وما يدخل في الربا. وبكذا تكون استثمرت بطريقة ذكية وحققت أرباح كويسة.
مثال: شخص استثمر في وديعة مرابحة بقيمة 50,000 ريال لمدة سنة بهامش ربح سنوي %2.25. في نهاية المدة المحددة بتطلع أرباحه 51,125 ريال.
التسويق بالعمولة
التسويق بالعمولة واللي الناس الآن هابين فيه ويحبونه. طريقته باختصار إنك تسوق لمنتجات ماركات أو أشخاص، ويعطونك عمولة على كل بيعه تجي من طرفك.
ناخذ مثال على السريع: لو خالد قاعد يسوق لمنتج على موقعة أو في السوشيال ميديا برابط أو كود خاص فيه وجاء عميل اشترى المنتج. كذا خالد هو الكسبان وتجية العمولة وهو مرتاح.
المختصر المفيد
طرق صناعة الدخل الاستثماري كثيرة، ولو نعدها من اليوم لبكرة ما بنخلص. وفيه خيارات حلوة وبسيطة بس تحتاج شوي من وقتك تفكر فيها وتدور على حلول ذكية تستثمر فيها فلوسك. وأهم شيء تكون تتماشى مع اهتمامك ومهارات ويكون عندك استعداد إنك تجتهد حبتين عشان تنجح وصدقني في وقت قليل بتشوف نتيجة مرضية من الدخل الاستثماري!
