السنة الجديدة قربت، وهذا معناه أهداف جديدة، أحلام كبيرة، خطط تكتيكية. بس، في شيء مهم ننساه لمّا نجي نكتب أهدافنا للسنة الجديدة! وهو الرفاهية المالية. يعني حنّا نخطط لكل شيء ونغفل عن أهم تفصيله اللي بتعيشنا حياة حلوة وفيها مساحة للأشياء اللي نحبها. عشان تبدأها صح، بنعطيك أربع عادات مالية صحية تجهزك للنجاح في 2025.
العادة الأولى: الميزانية، الميزانية، والميزانية!
أول خطوة عشان صحتك المالية تزين هو أنه يكون عندك ميزانية واضحة، زيها زي لمّا تبدأ دايت ورياضة أكيد إنك ما بتدخل النادي على عماك ويجيك إصابات! بيكون عندك جدول معين تمشي عليه. ممكن في البداية تتعيجز تسويها وتشوف انها شغلانه وما منها فايدة وأنت ذيب في صرّفك! بس اسمع منّا وابدأها صح، ومن تجربة لو بديت وفهمت كيف الأمور تمشي الميزانية بتساعدك تعرّف كم قاعد تصرف ووين فلوسك تروح وبتخليك تخطط للجاي.
سهلّها على نفسك واستخدم أداة الميزانية من ثاندر تساعدك تضبط مصاريفك بسهولة.
العادة الثانية: ادفع لنفسك أولاً
إنك تدفع لنفسك وتهتم لأمرها هذا لازم يكون على رأس قائمتك في 2025. الطريقة هذي معناها إنك تخلّي فلوس كل شهر للادخار والاستثمار قبل ما تدفع الفواتير أو تصرف على الكماليات. الفلوس اللي بتستثمرها تراها بترجعلك وتنبسط فيها وتحقق أحلامك وأهدافك اللي خططت لها. عط رفاهيتك المالية أولوية ولا تبخل بالادخار والاستثمار لنفسك! لأن الموضوع أكبر من كذا وفيه أمانك المالي.
سهل تنقال، صعب تتنفذ؟ ممكن تبدأ بفكرة صندوق الحلول وتكون جاهزماليًا للطوارئ والأزمات غير المتوقعة. والسنة الجاية إذا الله أحيانا، حاول تخصص 10% من دخلك كل شهر للاستثمار.
نصيحة: عشان ما يكون كلامنا في الهواء افتح حساب إدخار ولا تلّمسه! خل صرفك من حسابك العادي. تقدر تشكرنا بعدين.
العادة الثالثة: صفّي ديونك
خل أولويتك إنك تصفي الديون اللي عليك أول بأول. لا تخليها تتراكم وتزيد الفوائد لأنها بتكون مصاريف زايدة عليك.
العادة الرابعة: ادخل لعبة الاستثمار
مع ارتفاع معدلات التضخم بشكل مستمر، الذكي هو اللي يلعبها صح ويستثمر بانتظام على المدى الطويل. الموضوع ما يبيله شيء كل اللي مطلوب منك تستثمر ب 10 أو 20% من راتبك في الأسهم أو صناديق الاستثمار المشتركة أو الاستثمار اللي يعجبك. المهم إنك تستثمر وتستمر لأن الطريقة هذي تساعدك تبني ثروة بمرور الوقت وتوفر لك أمان مالي في المستقبل.
معلومة
حسب الأبحاث، إنك تتبنى عادة جديدة ياخد حوالي 18 إلى 254 يوم، ومتوسط 66 يوم عشان العادة الجديدة تصير سلوك تلقائي. يعني ياخد شوية وقت بس عادي دامها العادة تسوى الانتظار. ولا تكثرها على نفسك إذا تبي تغير دايم ابدأ بعادة وحدة ولا تنسى تبدأ تدفع لنفسك أولاً وبتشوف ثروتك تزيد بمرورالوقت.
سنة جديدة سعيدة.
