اساسيات سوق الأسهم

من يوم إنك صغير وأنت تسمع عن سوق الأسهم في الأخبار. كبرت وصرت تسمع عنه أكثر وتشوف ناس اغتنوا منه، وتتحمس مع الأرقام المتداولة والأرباح وتحس ودك تدخل الحين وتصير مستثمر. وخصوصاً لما قال وزير الطاقة الأمير عبدالعزيز بن سلمان “من لا يساهم أو يشارك في شراء أسهم أرامكو سيعض أصابع الندم”.هنا يجي في بالك على طول هالسؤال. هل الاستثمار مربح لهدرجة؟ أكيد. وبيكون مربح أكثر، لو فهمت الأساسيات وعرفت تختار استثماراتك صح. في هذا المقال بنشرح لك الأساسيات و إن شاء الله نشوفك مستثمر قد الدنيا.

ايش يعني سوق الأسهم؟

سوق الأسهم بمفهومه البسيط هو سوق كبير ومنظم تطرح فيه الشركات أسهمها، ويدخل الناس يبيعون ويشترون الأسهم حسب قيمتها الحالية وتوقعاتهم لقيمتها المستقبلة. ويرجع تاريخ أول سوق أسهم في العالم إلى القرن الـ 16 في مدينة انتويرب البلجيكية، ومن بعدها  دخل هولندا في القرن الـ17، وكمل انتشاره في بريطانيا وأمريكا.  

إلى وقتنا الحالي وسوق الأسهم محافظ على مكانته وسنة بعد سنة يقوى. وفي 2023 وصلت القيمة السوقية لكل أسواق المال العالمية 101.49 تريليون دولار، بحسب الاتحاد الدولي للبورصات. 

مفهوم السهم

تخيل أن الشركة عبارة عن بيتزا. صاحب الشركة يبي يجذب مستثمرين جدد عشان يكبر رأس مال الشركة ويستثمر في مشاريع أكثر، فيبيع كم قطعة من البيتزا في السوق بسعر اليوم، ويخلي باقي القطع له. لو سعر البيتزا زاد، سعر القطعة حقتك بتزيد، وتقدر تبيعها بسعر أعلى من السعراللي شريتها فيه. في المثال هذا، البيتزا الكاملة هي الشركة والقطع هي الأسهم.

الطرح العام الأولي (IPO) 

إذا الشركة ملكيتها خاصة وقررت أنها تجمع رأس مال من مستثمرين جدد عشان تقوى أعمالها وتفتح مشاريع أكثر. فتروح تبيع أسهمها في سوق الأسهم لأول مرة وتخلي الناس تتداول فيها. وهذا هو مفهوم الطرح العام الأولي بكل بساطة.

(طرح أسهم الشركة لأول مرة في سوق الأسهم )

ايش اللي يحرك سعر السهم؟

أسعار الأسهم تتحدد حسب  العرض والطلب في السوق. لو فيه ناس تبي تشتري أسهم أكثر من اللي يبيعون هنا الطلب يصير أكبر من العرض بالتالي السعر يزيد. والعكس صحيح إذا فيه ناس تبي تبيع أكثر من ما تشتري العرض يصير أكبر من الطلب، والسعر يقل.

إنك تفهم العرض والطلب شيء هين وبسيط … اللي أصعب منه إنك تفهم ايش الشركات اللي صدق تستاهل تستثمر فيها ويكون عندك نظرة مستقبلية للشركات اللي تقييمها اليوم أقل من اللي بتكون عليه بعد كم سنة. 

من العوامل اللي تأثر على أسعار الأسهم:

• العوامل الاقتصادية المحلية والعالمية 
• مقارنة أداء الشركة بغيرها في نفس القطاع 
• أخبار وأداء الشركة المالي
• معنويات  المستثمرين