إذا صبيت العسل على العريكة مو تحس كذا قوامة ثقيل ولزج وغصب ينزل معك، على عكس السمن إذا بتصبه يبيلك تنتبه لأنه سائل ويمكن ينكب وما تلحقه.
دايم تسمع كلمة سيولة وتربطها بمخك بالسوائل، لكن الصدق أن مصطلح “السيولة” (Liquidity) في لغة الاستثمار ماله دخل بالسوائل. لكن له علاقة بنقل القيم من أصل لآخر. يعني زي ما السوائل تنكب معك بسهولة. الأصول السائلة هي الأصول اللي تتحول لفلوس نقدية بسرعة بدون ما تخسر قيمتها.
الأصول السائلة وغير السائلة
لو جينا لأكثر أصل سائل هي الفلوس النقدية “الكاش”، تعتبر وسيط عالمي للتبادل. تبيع وتشتري فيها بسرعة وما تخسر قيمتها إذا تبدلت بأصل ثاني.
كمان فيه أصول ثانية سائلة نسبيا لأنها تتحول لفلوس بسرعة وأكبر مثال عليها الذهب. اللي خلا الذهب أصل سائل أنه وزنة ثابث في كل مكان، وسوقة كبير. تخيل أن لندن لحالها، ينباع ويشترى فيها تقريبًا 1000 طن من الذهب كل يوم.
الميزتين هذي – خلت المشترين والبائعين يتواصلون مع بعض بسرعة ويتفقون على السعرفي دقايق بس!
نجي للأصول الغير سائلة، وهي الأصول اللي صعب تحولها لفلوس نقدية بشكل سريع.
العقارات مثال على أصل غير سائل. سوق العقار مره مختلف عن سوق الذهب. كل أرض لها موقع ومساحة في أراضي كبيرة وأراضي صغيرة.(مثلاً أسعار العقار في الرياض تختلف من شمالها لجنوبها). هذا كوم وتقييم أصحاب العقار لعقارهم كوم ثاني، لأنه سوق العقار ماله وزن ثابت زي الذهب .هذا الشيء يخلي تقييم العقار مو شئ بسيط ويصير الاتفاق صعب بين البائع والمشتري. عشان كذا تشوف أراضي تنباع في شهور وأراضي في سنين.
واللي يزعل، لو صاحب الأصل غير السائل محتاج يبيعه بسرعة، بينجبر يرضى بسعر أقل بكثير من قيمة الأصل.
أهمية السيولة
لما تقرر تستثمر وتبني محفظة حط في بالك هالشيء. لازم يكون عندك أصول سائلة وأصول غير سائلة، لأن السائلة بتقدر تصرف منها وتمشي حياتك اليومية وبتكون احتياطك للظروف الطارئة. الأصول غير السائلة ما بتقدر تصرفها بسرعة لو احتجت، وبالمقابل بتكون عوائدها أعلى من الأصول السائلة.
وبالنهاية اختياراتك تعتمد على:
– مصاريفك.
– خطة استثمارك.
– قدرتك على تحمل المخاطر.
