أكيد قد مرت عليك كلمة “أصل” أو أحد عطاك نصيحة إنك لازم يكون عندك أصول، لكن تعرف ايش يعني أصل؟ الموضوع أبسط مما تتصور!
الأصل هو أي شيء له قيمة اقتصادية ويملكه شخص أو شركة.
والأمثلة عليه كثيرة ممكن يكون بيت، سيارة، ذهب، فضة، عقارات، أسهم. وقيس عليها الأشياء اللي عندك هل تعتبر أصول أو لا.
الفرق بين الأصول و الاستثمار
بعض الأصول تنفع تكون استثمارات، لأن قيمتها تزيد مع الوقت، وإذا انباعات تجيب ربح دبل قيمتها.
مو كل الأصول تعتبر استثمارات، لأن مو كلها تجيب دخل وأرباح بعض الأصول تخسّرك، مثلّا لو عندك عقار قديم وكل مره ترممه وتسوي له صيانة بالنهاية بتلقى نفسك دافع فيه أكثر من القيمة اللي شريتها فيه (خصوصًا لو شارية زمان). بعض الأصول تقل قيمتها لو جيت تبيعها وأكبر مثال عليها الجوالات والسيارات تشتريها غالية ويطيح سعرها إذا بعتها.
أنواع الأصول
نقدر نقسم الأصول إلى ثلاثة أنواع: الأصول الملموسة، الأصول غير الملموسة، والأصول المالية.
الأصول الملموسة
الأصول الملموسة هي الأشياء اللي لها قيمة وتكون ملموسة. زي:
- الأراضي
- السيارات
- العقار
- الأجهزة
- الذهب والفضة
- اللوحات الفنية
الأصول غير الملموسة
هي أصول ما تقدر تلمسها في الواقع، ولها قيمة بس مو مادية. زي:
- حقوق النشر
- الملكية الفكرية
- العلامات التجارية
- التراخيص والتصاريح التجارية
طيب دامها مو ملموسة ليه لها قيمة؟
لأنها تُستخدم عشان تجيب فلوس. عندك مثلاً شركة كوكاكولا، تحافظ وصفة الكولا حقها لأنها من بيع الكولا قاعدة تدخل ملايين. صح أنه أصل غير ملموس بس له قيمة. وقيس عليها باقي شركات الأكل اللي متميزين بوصفة معينة أو حقوق النشر حق الأغاني والبرامج كل هذي تعتبر أصول غير ملموسة.
الأصول المالية
وأخيراً، عندنا الأصول المالية، وتشمل كل شيء له علاقة بالفلوس. زي:
- الفلوس اللي في حسابك
- الفلوس اللي في جيبك
- صناديق الاستثمار
- الأسهم
- السندات
أي أصل بتملكه من خلال ثاندر يعتبر أصل مالي.
السيولة
كلمة “السيولة” مالها علاقة بالسوائل، لكن متعلقة بتدفق القيمة. فكر فيها كأنها زي بعض المواد اللي تنكب بسرعة وبعضها لا زي المويا والعسل واحد منها سائل بزيادة والثاني لزج بالقوة ينزل.
في المصطلحات المالية، السيولة هي الوقت اللي تحتاجة عشان تحوّل أصل لأصل ثاني. الفلوس هي أكثر الأصول سيولة. تتحرك بسرعة، وقيمتها ما تضيع إذا حولتها. في مثالنا اللي قبل، الفلوس زي المويا والأراضي، زي العسل. إنك تبيع أرض أو عقار ياخذ وقت، ولو اضطريت تبيعها بسرعة بيطيح سعرها وتبيعها بخسارة.
إذا جيت تختار الأصول خلّي في بالك موضوع السيولة، وحاول تسوي موازنة بين الأصول السائلة والغير سائلة لأن كل وحدة منهم بتفيدك في شيء. عندك الأصول السائلة بتستفيد منها في مصاريفك اليومية وأوقات الطوارئ، والغير سائلة بتستفيد منها مستقبلاً. من ناحية العوائد والأرباح النصيب الأكبر بيكون للأصول غير السائلة. شوف وش يناسبك ووزع فلوسك على أنواع مختلفة من الأصول حسب احتياجك.
صافي القيمة
الحين عرفنا إن الأصول هي الأشياء اللي تملكها ولها قيمة. الخصوم عكسها هي الأشياء اللي تاخذ منك قيمة زي القروض، الفواتير، الدين، الضرائب.
صافي القيمة هو الفرق بين الأصول والخصوم، أو اللي بيبقى لو بعت الأصول وسددت كل الخصوم. هو أكثر طريقة شائعة لقياس الثروة. صافي القيمة ممكن يكون إيجابي، لو الأصول أكثر من الخصوم، أو سلبي، لو الخصوم أكثر من الأصول. تقدر تحسب صافي القيمة حقك بالطريقة هذي. الأصول – الخصوم= صافي القيمة
ليه الأصول مهمة
الأصول والخصوم هي اللي تحدد صافي القيمة حقك وموفقك المالي وين أنت ووين متوقع تروح. إذا صافي القيمة عندك عالي بيكون عندك حرية أكبر في الاختيار، وأمان ضد الطوارئ المالية. وبيساعدك تحدد أهدافك المستقبلية وتقارن بين وضعك الحالي والمكان اللي تبي توصل له.
