تخيل أنت وأصحابك قررتوا تجمّعون فلوس وتشترون محل صغير. وكل واحد فيكم حط مبلغ عشان تشترونه وتجهزونه. صندوق الاستثمار زي كذا بالضبط كأنه صندوق جمع فلوس. كل واحد يحط فيه شوي، والفلوس هذي كلها تتجمع وتُستثمرفي شركات أو مشاريع مختلفة، ويديرها مدير الصندوق. هدفه الأساسي تنفيذ استراتيجية الاستثمار المتفقين عليها، الحلو في صندوق الاستثمار أنه يعطيك طريقة سهلة للاستثمار في مجموعة مختلفة من الأصول زي الأسهم والسندات والعقار وغيرهم.
“عط الخبز لخبازه ولو أكل نصه”. هذي أكثر مقولة تنطبق على صناديق الاستثمار اللي يديرها المختصين، ويشتغلون لمصلحتك. بالذات إذا أنت ما عندك وقت وما فيك حيل تتعلم كيف تختار استثماراتك صح. اشتري راحة بالك وابدأ مع مدير صندوق فاهم شغلة زين، وطبيعي أنه يطلب منك رسوم اشتراك أو رسوم أداء حسب نوع الصندوق.. صناديق الاستثمار فيها مخاطر وعوائد متنوعة حسب الأصول اللي تستثمر فيها.
وكل المعلومات اللي تحتاجها عن أي صندوق استثمار بتلقاها في نشرة الإصدار الخاصة فيه واللي غالباً تكون موجودة في موقع هيئة السوق المالية، وتعتبر وثيقة رسمية تشرح تفاصيل الصندوق وأهدافه.
أنواع صناديق الاستثمار المشتركة
فيه أنواع مختلفة من صناديق الاستثمار المشترك، وكل نوع يركز على فئة معينة من الأصول ومستوى مختلف من المخاطر.
صناديق الأسهم:
تستثمر هذي الصناديق بشكل أساسي في الأسهم. تعطيك عوائد مرتفعة، بس في نفس الوقت مخاطرها عالية.
صناديق السندات:
تستثمر هذي الصناديق في السندات، وتعتبر أكثر أمان من الأسهم، بس عوائدها أقل.
صناديق أسواق النقد:
تستثمر هذي الصناديق في أوراق مالية قصيرة الأجل ومنخفضة المخاطر زي السندات الحكومية. تعتبر آمنه بس عوائدها متوسطة.
الصناديق المتوازنة:
تجمع هذي الصناديق بين الأسهم والسندات، وهذا الشيء يعطيك توازن بين النمو والأمان. تعتبر خيار كويس إذا كنت تبي مخاطرة منخفضة مع استقرار.
كم مره يمديك تكتتب ( تشترك ) في صندوق استثمار؟
الاكتتاب في صندوق استثمار يختلف عن اشتراكتنا الدورية زي نتتفليكس واشتراك النت. في لغة التمويل نقدر نعرفه أنه عدد المرات اللي يقدر فيها الشخص أنه يشتري وثيقة في صندوق الاستثمار.
نفس الشيء ينطبق على الاسترداد. ومعناه كم مره تقدر تسحب فلوسك من صندوق الاستثمار. وطبعاً الاكتتاب والاسترداد يختلفون من صندوق لصندوق.
مزايا صناديق الاستثمار المشتركة
خلنا نتعرف على بعض الأسباب اللي تخلي أغلب الناس تختار صناديق الاستثمار المشترك:
التنويع:
أنت كذا بتمشي على قاعدة ” لا تحط البيض كله في سلة وحدة “. فلوسك بالطريقة هذي بتتوزع على استثمارات متنوعة وتقلل المخاطر المتوقعة.
الإدارة المهنية:
بدون قروشة وبدون ما تقضي ساعات وشهور وسنين، عشان تتعلم كيف تختار استثماراتك صح . بيديرها بدالك مختصين يشتغلون عنك.
السيولة:
السيولة في صناديق الاستثمار عالية. تقدر تبيع وتشتري بسرعة وسهولة في نهاية كل يوم تداول.
الوصول إلى أسواق متنوعة:
صناديق الاستثمار المشترك تعطيك صلاحية تستثمر في الأسواق الدولية والصناعات اللي صعب توصل لها لو استثمرت بنفسك.
عيوب صناديق الاستثمار المشتركة
على أنها صناديق الاستثمار المشترك مفيدة، بس فيه بعض العيوب لازم تاخذها في الاعتبار:
رسوم الإدارة:
دامك شريت راحة بالك وخليت أحد يستثمر عنك. مدير الصندوق بياخذ منك رسوم إدارة، وهذا الشيء ممكن يقلل عوائدك على المدى الطويل.
عدم وجود سيطرة على الاستثمارات:
كمستثمر، ماتقدر تختار الأسهم أو السندات اللي يشتريها لك الصندوق. المدير ياخذ كل القرارات.
الحصول على عوائد أقل:
صناديق الاستثمار المشترك تعطيك عوائد متوسطة مقارنة بالاستثمارات الخطيرة زي الأسهم، والسبب أنها متنوعة وتدير المخاطر.
