أكيد تعرف وش يعني”دين” لكن قبل ما تبدأ تقرأ عنه أكثر خلنا نعرّفه لك بشكل مبسط. الديون هي فلوس أنت متسلفها من شخص ثاني أو البنك. قانونياً، مطلوب منك تسدد المبلغ اللي تسلّفته في الوقت المحدد، وعادةً يكون عليه فوايد. كأنها فلوس بالإيجار.
في لغة التمويل، المدين هو الشخص اللي يتسلف، والدائن هو الشخص اللي يسلف.
ليه أتسلف الفلوس بفوايد؟
الفوايد هي تعويض للي يسلفك لأنه السداد بيتم على دفعات ووقت طويل، بس كل ما تسدد الفلوس بسرعة، كل ما الفوايد بتكون أقل.
أنواع الديون
دين مضمون
الدين المضمون هو قرض مرتبط بأصل أو ملكية تكون قيمتها كافية لتغطية مبلغ الدين. ( يكون الأصل مرهون بالدين) يعني لو المتسلف ما سدد، ياخذون منه الأصل بدل الفلوس اللي مسلفينه ياها.
دين غير مضمون
الدين غير المضمون هو قرض عادي مو مرتبط بأي أصول يعطونه الشخص بناءً على تقييمه المالي في سمة.
أمثلة على الديون
الديون أشكال وألوان ممكن يكون، قرض عقاري أو شخصي، تابي تمارا أو حتى فلوس تسلفتها من صديقك أو أهلك.
ديون زينة vs ديون شينة
أول ماتسمع كلمة ديون تجي في بالك سيناريوهات شقى. إيقاف خدمات، منع من السفر. وهو صدق وش الحلو إنك تكون مديون؟ بس أوقات يكون الدين اللي ماخذه كويس وبينفعك. الفرق بين الديون الزينة والديون الشينة هو القيمة على المدى الطويل.
لو تسلفت فلوس عشان تدفع لأشياء عليها القيمة زي إنك تشتري بيت ولا تكمّل تدرس ماجستير، كذا أنت بتستفيد منها في المستقبل وتأثيرها عليك إيجابي.
من جهة ثانية، الدين الشين اللي يقعد على قلبك وأصلاً ما منه فايدة وغلط تاخذه هي ديون الكماليات لأنها ما تعطيك قيمة مع الوقت، زي إنك تشتري جوال جديد وأنت عندك واحد ولا شنطة براند أو حتى عبايا فوق الـ500 ريال وتقسيطها!
نفس الموضوع ينطبق على الشركات. ممكن يكون مؤشر كويس لما شركة تتسلف مبلغ معقول عشان تمول مشاريع كبيرة، وتجيب منها فلوس أكثر من اللي تسلفتها. بس، لو شركة تسلفت فلوس عشان تدفع رواتب موظفيها هذا مؤشر خطر ويمكن دلالة على الإفلاس.
ليه الناس تتسلف؟
الصرف الزايد
إذا صرفيتك أكثر من راتبك أكيد بيجي نص الشهر وأنت مطفر وبنتضطر تتسلف، وإذا كنت مطلّع بطاقة ائتمانية بحد عالي وتشتري أعلى منه بتلقى نفسك في دائرة مقفلة والفوائد خانقتك!
الميزانية الضعيفة
الميزانية مو كلام فاضي، بالعكس هي عينك اللي تحرص فيها على فلوسك وتشوف وين قاعد تصرف وكم توفر. بدونها بتصرف أكثر وبتلقى نفسك عندك فواتير وديون مو قادر تسددها!
كيف اطلع من دوامة الديون؟
السؤال المهم والأهم، جوابه عندك وتطبيقة بيدك. ولكن بنعطيك نصيحة تساعدك، أول شيء لازم تسوي ميزانية وتكتب بالورقة والقلم ( تقدر تكتب بالجوال عادي الأمور سهالات) وش لك وش عليك بعد ما تخلّص حسبتك وفر فلوس على جنب عشان تسدد الدين اللي عليك ويبقى لك مبلغ تعيش فيه، ولو مصاريفك أعلى من راتبك حاول تقلل منها.
