شفت لما تجلس مع جدك ويعطيك معلومة تصدمك عن بيت العائلة اللي عايشين فيه؟ أنه شراه “أيام الطيبين” 1000 متر بـ 15 ألف ريال، والحين متر العقار ما يقل عن 1000 ريال! ( في أحياء الرياض المتواضعة). ولا أعطيك مثال على جيلنا الحالي؟ قبل خمس سنوات، كانت عشرة ريال تجيب لك 4 شاورما و 2 بيبسي والحين نفس العشرة عساها تجيب لك حبة شاورما! كل هذا بسبب التضخم.
طيب وش هو التضخم؟
علاقتنا بالتضخم مُب جديدة، تراها بادية من أيام الحرب العالمية الثانية، لما الرئيس الأمريكي نينكسون فصل الدولار عن الذهب وقعد يطبع فلوس بطريقة عشوائية عشان يمول الحرب. وبكذا الفلوس صارت ورق ماله قيمة!
خلونا نفهمه بشكل أبسط.التضخم يا طويل العمر يشتغل على تقليل القوة الشرائية مع زيادة الأسعار اللي تكون أسرع من زيادة الرواتب. وهذا الشيء يخلي الناس تصرف فلوس أكثر عشان تقدر تشتري الاحتياجات الأساسية، والمستهلك المسكين مطحون تحت عجلة التضخم للأسف.
ايش يعني القوة الشرائية؟
خلنا نتخيل إن كل عملة لها مستوى معين من القوة، زي الإنسان بالضبط – يدخل النادي ويبني عضلات ويتغذى ويقوى ولو ما التزم يخسرها. العملة نفس الشيء، تقوى وتضعف ومقدار القوة والضعف هو اللي يحدد تقدر تشتري بالعملة كم غرض.
زي مثال الشاورما اللي ذكرناه لك في البداية اليوم لو تبي تشتري شاورما أنت محتاج دبل العشرة ريال بس قبل خمس سنين العشرة ريال كانت تجيب لك 4 شاورما بالراحة. وهذا الشيء تفسيره أن قوة الريال الشرائية قلت.
وش أسباب التضخم؟
فيه قوتين رئيسيتين هي سبب التضخم: التضخم بسبب زيادة الطلب والتضخم بسبب زيادة التكاليف.
التضخم بسبب زيادة الطلب:
في الحالة هذي يكون التضخم بسبب زيادة الطلب على المنتجات والخدمات بسرعة أكبر من الإنتاج. بمعنى ثاني، أن فيه فلوس كثيرة ومنتجات قليلة. وهذا الشي يصير لما تكون الدولة في فترة نمو اقتصادي
خلينا ناخد الملابس كمثال – لو الناس عندها فلوس وقدرة شرائية ممتازة، لكن في المقابل المحلات ماعندهم القدرة والموارد الكافية لانتاج قطع أكثر، هذا الشيء بيسوي اختلال بين العرض والطلب ويقل العرض بشكل كبير واللي بدوره يسبب ارتفاع وتضخم في الأسعار.
وناخذ مثال ثاني من الواقع. “مق هاف مليون الوردي” اللي سبب ضجة في أكتوبر2024 والناس كلها ودها تشتريه ولكن كمية انتاجه محدودة هذا الشيء خلا سعرة يتضخم من 24 ريال إلى 2000 ريال!! والسبب أن العرض أقل من الطلب.
التضخم بسبب زيادة التكاليف:
هذا النوع من التضخم يصير لما تكلفة الإنتاج تزيد. يعني تكاليف المواد الخام والعمالة والجمارك والضرايب كلها تدّبل، وبكذا التاجر يرفع سعر المنتج النهائي على المستهلك.
متى يكون التضخم زين؟
التضخم نعمة ولا نقمة؟ على أنه فيه جوانب سلبية واضحة للتضخم، لكن كمان فيه فوايد.
لما قيمة عملتك تقل، قيمة ديونك كمان بتقل. وهذا معناه إنك بتقدر تسدد ديونك بفلوس أقل. ولو فترة التضخم جت مع زيادة في الرواتب، تسديد الديون بياخد جزء صغير من راتبك. والناس اللي عندهم أصول ملموسة (زي العقارات) بيستفيدون من التضخم – لأنه مع الزيادة يقدر يبيعها بسعر أعلى.
متى يكون التضخم شين؟
الجوانب السلبية كثيرة وواضحة – أكبر مثال عليها أن الرواتب مو قاعدة تزيد بنفس معدل زيادة الأسعار. وهذا جابر الناس أنها تصرف وتصرف عشان تقدر تعيش وتشتري احتياجتها الأساسية والمستهلك في عجلة التضخم المستمرة هو مضغوط مالياً وكمان ومديون. التضخم مؤذي جدًا وخصوصاً لو لمس حسابات الاستثمار والادخار، لأن وقتها الفلوس اللي كنت تستثمرها ما راح تبقى بنفس قيمتها اللي كانت عليها أول.
إذا بنلخص هالمقال في نصيحة وحدة مهم إنك تعرفها وتطبقها. إن التضخم صاير صاير ولكن أنت كشخص واعي وحاب تحمي نفسك منه. نقولك استثمر في الأصول اللي بتعطيك أرباح تتجاوز معدل التضخم وبكذا تكون متطمن وضامن أن فلوسك اليوم ولا بعد سنة أو خمسين سنة ما بتصير بدون قيمة، ولكن قيمتها بتدبل وتعيشك حياة كريمة.
