في حياتك لا تخلّي شيء للحظ أو الصدفة تعلم إنك تخطط طريقك لأنها مرة بتصيب ومرة بتخيب! نفس النصيحة طبقها على استثمارك. عشان تنجح لازم تتعلم كيف تحلل الأسهم ومو لازم تكون خبرة أو تتعمق بزيادة، لكن كل ما عرفت أكثر كل ما صدت أكثر. تحليل الأسهم مو كلام فاضي، بالعكس، هو سلاحك اللي بيساعدك تكتشف فرص ذهبية. ويخلّي رحلتك الاستثمارية ممتعة، صح انه يبيله شوية تركيز وفهم، لكن مع الوقت والممارسة، راح تصير فنان وتعرف كيف تختار الأسهم الصح! في هالمقال بنعطيك الزبدة ونعلمك أنواع التحليل.
التحليل الأساسي
هذا النوع من التحليل يعتمد على فكرة إن سعر السهم الحالي ما يعكس قيمته الحقيقية. يعني ممكن تلاقي سهم سعره أقل من قيمته الفعلية، وهذا يعطيك فرصة حلوة تحقق عوائد عالية في المستقبل. التحليل الأساسي يستخدمة المستثمرين اللي يهمهم الربح علي المدى الطويل. لأنهم وقت التحليل يركزون على أساسيات الشركة وأدائها في المستقبل وما تهمهم تقلبات السعر على المدى القصير.
التحليل الفني
هذا النوع من التحليل يعتمد على فكرة إن سعر السهم يعكس قيمته الحقيقية وكل معلوماته، وإن الأسعار تتحرك في اتجاهات معينة. يعني، من خلال تحليل تاريخ سعر السهم، ممكن تتوقع سلوكه السعري في المستقبل. الفرق بينهم إن التحليل الأساسي الهدف منه فرص على المدى الطويل، والتحليل الفني يركز على تقلب الأسعار على المدى القصير.
حنّا في ثاندر نشجع على الاستثمار على المدى الطويل. بإنك تركز على الشركات الكويسة اللي تتداول بأسعار عادلة، ونؤمن إن المستثمرين قادرين يغلبون السوق مع الوقت.
التحليل الأساسي يعتمد على طريقتين:
- التحليل الكمي: يعتمد على تحليل الأرقام
- التحليل النوعي: يعتمد على تحليل ما وراء الأرقام
التحليل الكمي
التحليل الكمي يعتمد على الأرقام والبيانات المالية للشركة عشان تعرف وضعها المالي ووين رايحة في المستقبل. كل الشركات المدرجة في سوق الأسهم لازم تفصح عن معلوماتها المالية – وغالبًا تنشرها في تقرير الأرباح الربع السنوي. هذي التقارير تعطيك معلومات مالية عن ثلاث أشياء: بيان الدخل، وميزان المدفوعات، وبيان التدفق النقدي. كجزء من تحليلك للأسهم، لازم تطّلع على البيانات وتجاوب على هذي الأسئلة:
هل الشركة تنمو؟
تقدر تعرف عن طريق صافي الدخل – لو الرقم قاعد يزيد من سنة لسنة، هذا مؤشر على نمو الشركة.
صافي الدخل = إجمالي الدخل – إجمالي المصاريف
هل الشركة تتحكم في تكاليفها؟
هامش الربح هو مقياس لربحية الشركة – كل ما كان هامش الربح أعلى، كل ما الشركة تقدر تتحكم في تكاليفها الكلية.
هامش الربح = صافي الربح / إجمالي الإيرادات
هل الشركة تستخدم فلوس المستثمرين بكفاءة؟
العائد على حقوق الملكية يبين قد ايش الشركة تكسب أرباح من كل ريال من حقوق المساهمين. العائد العالي معناه إن الشركة بتقدر تعطي أرباح صافية لمساهميها. كل ما كان العائد على حقوق الملكية أعلى مقارنةً بالمنافسين، كل ما كانت إدارة الشركة قادرة تعطي أرباح للمساهمين.
عائد حقوق الملكية = صافي الدخل / حقوق المساهمين
هل السهم مقيم بأعلى من قيمته، أقل من قيمته، ولا بسعر عادل؟
عشان تعرف فيه طريقتين:
الطريقة الأولى
من خلال حساب نسبة السعر إلى الأرباح. تحدد نسبة السعر إلى الربح المستوى السعري اللي مستعد يدفعه المستثمرين لكل ريال من أرباح الشركة. بمعنى ثاني إن المستثمرين مثلاً مستعدين يدفعون 10 ريال مقابل ريال ربح. بشكل عام كل ما زادت نسبة السعر إلى الربح بتكون قيمة السهم أعلى وبيجذب المستثمرين، وكل ما قلت نسبة السعر إلى الربح بيكون السهم أقل من قيمته العادلة ويعكس سوء الإدارة أو مؤشر لخسارة الشركة.
نسبة السعر إلى الربح = سعر السهم / ربح السهم
الطريقة الثانية
من خلال حساب نسبة السعر إلى النمو. نسبة السعر إلى النمو هي نسبة السعر إلى الأرباح مقسومة على معدل نمو أرباح الشركة خلال فترة زمنية محددة. تعتبر هذي الطريقة مقياس أكثر تطور من نسبة السعر إلى الأرباح العادية لأنه ياخذ في الاعتبار احتمالات النمو المستقبلية في تقييم الشركة. إذا كانت نسبة السعر إلى النمو أقل من 1 معناه إن السهم مقيم بأقل من قيمته، وإذا كانت أعلى من 1، فهو مقيم بأعلى من قيمته.
نسبة السعر إلى الأرباح إلى النمو = معدل السهم للربحية / معدل نمو الأرباح
هل الشركة معتمدة على الديون؟
الديون مو دائمًا تكون سيئة ممكن تستخدمها الشركة عشان تمول مشاريع بعوائد عالية على حقوق الملكية، لكن في حال كانت الديون هي الشريان اللي مخلي الشركة باقية، هذا مؤشر خطر. تعكس نسبة الدين إلى حقوق الملكية مقدار الدين اللي تتحمله الشركة مقابل كل ريال من حقوق الملكية. إذا كانت النسبة أقل من 1 معناه أن الشركة معتمدة على رأس مالها، أما لو طلعت النسبة أكبر من 1 معناه إن الشركة معتمدة على الديون بشكل كبير.
نسبة الدين إلى حقوق الملكية = إجمالي الديون / حقوق المساهمين
هل الشركة توزع أرباح؟
في العادة الشركات اللي لسا تنمو وما حطت رجلها في الأرض احتمال إنها ما توزع أرباح، لأنها تبي تستثمر قد ما تقدر عشان تكبر بسرعة. كثير مستثمرين يعتبرون الأرباح مصدر دخل سلبي – لو هالشيء مهم بالنسبة لك، ضروري تحسب عائد توزيعات الأرباح. كل ما كان العائد أعلى، كل ما كانت الأرباح اللي بتجيك أكبر.
عائد توزيعات الأرباح = توزيعات الأرباح السنوية لكل سهم / سعر السهم الحالي
هل السهم حساس لحركة السوق؟
مو كل الأسهم تتفاعل بنفس الشكل مع تغيرات السوق. عشان نقيس حركة السهم مقارنة بحركة السوق نستخدم مقياس “معامل بيتا” إذا السهم له قيمة بيتا أقل من 1 معناه أقل تقلب وأقل خطورة، وإذا كان له قيمة بيتا أعلى من 1 معناه أكثر تقلب وأكثر خطورة. كل ما زاد الخطر فرصة الربح بتزيد، والعكس كل ما قل الخطر الربح بيقل!
التحليل النوعي
التحليل النوعي واللي سميناه تحليل “ما وراء الأرقام” يركز على فهم الشركة بشكل أعمق بعيدًا عن الجانب الكمي. مثلاً عندك شركتين جيت تحللهم وطلعوا نفس البيانات المالية، لكن وحدة منهم عندها فريق إدارة أفضل أو ميزة تنافسية أقوى، أو أخبارها إيجابية ومتصدرة المواقع، أكيد بتاخذ هالامور بعين الاعتبار وممكن ترشحها الأفضل للاستثمار على المدى الطويل.
أهم الأشياء اللي تركز عليها إذا جيت تحلل نوعي:
فريق الإدارة
لو قلنا أنه هذا أهم معيار ما نبالغ لأنه حتى لو نموذج العمل مضبوط وأمورهم تمام بينحكم عليهم بالفشل إذا الإدارة سيئة! شركة ناجحة بإدارة سيئة زي”السفينة بدون ربان”. تخيل معي قرارات مو مدروسة بحكم قلة الخبرة أو العجلة وش بتتوقع؟. على إنه صعب تعرف فريق الإدارة واحد واحد بس حنّا ما نقول لك تكّي معهم، تقدر تشوف سيرهم الذاتية في في لينكد ان والمناصب اللي شغلوها قبل وكذا وكيف كان أدائهم وقتها.
نموذج العمل
نموذج العمل هو واحد من جوانب استراتيجية الشركة ويركز على أشياء كثيرة بس كلها مرتبطة ببعض، زي طبيعة العمل ومصادر الدخل الرئيسية والتكاليف، في الظاهر يبين لك الوضع سهل، لكن شوف ماكدونالدز يجيب دخل من العقارات أكثر من الوجبات السريعة! هل كنت متوقع؟.
الميزة التنافسية
نجاح الشركة على المدى الطويل يعتمد بشكل كبير على قدرتها في الحفاظ على ميزة تنافسية. المزايا التنافسية القوية، زي اسم ديزني في سوق أفلام الانيميشن وسيطرة مايكروسوفت على أجهزة الكمبيوتر، إذا الشركة ضمنت ميزتها التنافسية بتغرد لحالها وتنمو وتربح ولا أحد بيقدر يوصل لها! والمساهمين بيدخلون فيها ومتوقعين الأرباح لسنين.
أخبار الشركة والصناعة
من أهم الأشياء اللي لازم تسويها لمّا تبدأ تحلل، هي متابعة أخبار الشركة أو القطاع اللي بتدخله بشكل العام، تربط الأخبار سواءً إيجابية أو سلبية بتأثيرها على سعر السهم.
تذكر إن الاستثمار يبي له صبر وتعلم مستمر لا تستعجل، وحاول تفهم الشركة بشكل كامل قبل ما تستثمر فيها ولا تعتمد على نوع تحليل واحد! وإذا احتجت أي مساعدة، لا تتردد وأسأل أهل الخبرة.” زي ثاندر يعني”😉
