صناديق الاستثمار المتداولة

تخيل صناديق الاستثمار المتداولة على إنها سلة كبيرة فيها شركات كثيرة وتستثمر في أصول مختلفة، من خلال استثمارك في الصندوق تقدر تمتلك جزء صغير من كل أصول الشركات الموجودة في السلة. وطبعًا زي ما قلنا تو إن الصندوق يديرة محترفين يلعبون بالتريليونات.

الخطوة الأولى: اختار الاستثمار اللي يناسبك 

صناديق الاستثمار المتداولة فيها شركات كثيرة وقطاعات مختلفة، واللي يناسبك ما يناسب غيرك، لاتمشي مع الهبة كل واحد “ثوبه يتفصل له”. عشان كذا أول خطوة تسويها قبل ما تقرر تستثمر، تشوف وش المجال اللي ودّك تدخله وتحس إنه بيكون له مستقبل. 

مثلاً، عندك صندوق VOO 500 يستثمر في أكبر 500 شركة في سوق الأسهم الأمريكي، ويحقق عوائد سنوية بمتوسط %10. وإذا مؤمن إن الصين بتكون هي محرك اقتصاد العالم ، تقدر تستثمر في صندوق MCHI الصيني، اللي يستثمر في أكبر الشركات الصينية.

وش يميز صناديق الاستثمار المتداولة؟

• أرع 
• أسهل
• أرخص
• أكثر أمانًا

لو قلنا أنك تبي تستثمر في العقارات، أول شيء بتحتاج تحدد البلد اللي بيكون فيه العقار مثلاً (الرياض، جدة، أو برا السعودية)، بعدين تختار الحي والشارع، بعد ما تشتريه بتحتاج أحد يديره أو تديره بنفسك، ويبيله صيانه دورية. كله كوم ولو جيت تبيعه كوم ثاني لأنه أصل غير سائل بيطول الموضوع وإن اضطريت تبيعه بسرعة بتبيع بخسارة.

بس بدل هالقروشة فيه طريقة ثانية (أسرع، أسهل، أرخص، وأكثر أمانًا). إنك تستثمر في صندوق استثمار متداول متخصص في العقارات زي صندوق VNQI اللي يستثمر في كل شركات العالم العقارية ما عدا ( الشركات الأمريكية). تدير الصندوق شركة Vanguard، اللي تجمع فلوس المستثمرين وتستثمرها باستراتيجية معينة وتحقق من خلالها عوائد سنوية بمتوسط %7، وبدل ما تنشغل بالعقار الحقيقي اللي بتشريه وتديره وتصرف عليه، فيه فريق محترف بيشيل عنك الليلة، وتقدر تبدأ بمبلغ بسيط 50 أو 100 دولار وتمتلك أحلى عقار عالمي!

هالمرة خلّنا نقول إنك مهتم مثلاً بالتكنولوجيا والتقنية وودّك تستثمر في أمازون، بدل ما تستثمر في أمازون لحالها، استثمر في صندوق VOO 500 اللي بيعطيك حرية تستثمر في أمازون وجوجل وفيسبوك وغيرها كثير..

وزي ما قلنا قبل، الصناديق كثيرة، أول خطوة تسويها إنك لازم تحدد وجهتك وتختار استثمار يناسبك.

الخطوة الثانية: اختار مدير الأصول 

بعد ما اخترت الاستثمار المناسب بيكون فيه أكثر من مدير أصول في القطاع اللي دخلته سواءً العقارات أو الذهب أو التكنولوجيا. 

لو أخذنا شركة Vanguard، اللي تدير صندوق VNQI، كمثال: تخيل إنها تدير أصول بقيمة 7 تريليون دولار، وهذا الرقم يعتبر أكبر من الناتج المحلي الإجمالي للدول العربية مجتمعة! عشان كذا وأنت تبحث عن مدير أصول خلّك نبيه، لأنك بتلقى شركات ثانية زي Blackrock وFidelity، تقدر تبحث عنها وتقيمها قبل ما تستثمر فيها.  

الخطوة الثالثة: تحقق من خطأ التتبع

يعتبر معدل الخطأ في تتبع المؤشر معيار مهم إذا جيت تختار أي صندوق بتدخله، لأنه يحسب لك الفرق بين أداء الصندوق وأداء المؤشر اللي يتبعه. نبسطها لك، إذا قلنا أنه صندوق VOO 500 يستثمر في أكبر 500 شركة أمريكية، فـ الطبيعي إنه سعره بيتحرك حسب مؤشر S&P 500. إذا كنت تستثمر في الذهب، لازم الصندوق يتحرك مع سعر الذهب. كل اللي عليك إنك تقارن بين حركة الصندوق وحركة المؤشر اللي يتبعه، إذا متطابقين أمورك في السليم.

الخطوة الرابعة: تأكد من الرسوم

في الخطوة الرابعة والأخيرة من زبدة الاستثمار في صناديق الاستثمار المتداولة. شيّك على الرسوم، لأن الشركات اللي تدير الصناديق تاخذ رسوم مقابل الإدارة. لو اخترت الصندوق اللي بتدخله ولقيت شركتين تديره مثلاً Blackrock وVanguard، وحدة منه تاخذ رسوم بنسبة 0.1% والثانية بنسبة 0.5%، اختار الأرخص عشان تقلل تكاليف.