“كل الطرق تؤدي إلى روما” هالمقولة أعمق من كذا بس نقدر نستخدمها عشان نشرح أنواع الاستثمارات المختلفة، لأن الهدف منها واحد ( الثروة).
عشان كذا ممكن تفكر فيها على إنها طرق مختلفة لنفس الوجهة. فيه طرق طويلة، وطرق أقصر وكل ما قصر الطريق كل ما صار أخطر!
ومن حُسن حظك إنك مو مجبور تختار طريق واحد بس. تقدر تمشي في كذا طريق وتشوف اللي يسلك معك ويمديك تكون منه ثروة وتأمن نفسك من المخاطر. وأكيد كل طريقة لها مميزاتها وعيوبها كمّل المقال وتعرّف عليها.
أنواع الاستثمارات
الأسهم
السهم هو جزء صغير من شركة، وتقدر بكل بساطة تشترية من سوق الأسهم. إذا شريت سهم أنت رسميًا تملك حصة من أصول وأرباح الشركة. بعض الشركات توزع أرباح على أسهمها بانتظام بين فترة وفترة. المساهمين برضو يقدرون يحققون أرباح من بيع أسهمهم بأكثر من السعر اللي شروه فيها.
الاستثمار في الأسهم فيه نسبة مخاطرة لأن السوق يتأثر بعوامل كثيرة، منها العرض والطلب، الأزمات الاقتصادية وغيرها…
الصكوك
الصكوك هي أوراق مالية تشبه السندات، ومتوافقة مع أحكام الشريعة الإسلامية تصدرها الشركات والجهات الحكومية.
الحلو فيها فيها أن مدة الاستثمار تكون محددة ومعروف كم بتجيك أرباح، وتعتبر آمنه نسبيًا وأقل تذبذب وعوائدها منخفضة مقارنةً بالأسهم ، فرقها عن الأسهم إنك إذا أنت شريت سهم كأنك امتلكت جزء من الشركة، بالتالي تتحمل الربح والخسارة أما إذا شريت صك كأنك تمول الشركة لمدة محددة وبعائد معروف عشان كذا الشركة ملزمة إنها تسددك وبكذا مخاطرها بتصير أقل من الأسهم.
العقارات
الاستثمار في العقارات هو أكثر شيء مستقر نسبيًا والناس تحب العقار وانقال عنه “العقار الابن البار”.
تقدر تنوّع في العقار ممكن تشتري أرض وتبيعها أو شقة وتأجرها، والآن كثر تأجير غرف الاستديو باليومية لأنها تنفع للناس اللي ميزانيتهم محدودة وودهم يستثمرون في العقار. حتى لو شريت بيت العمر لك ولعيالك يعتبر استثمار. إيجابيات العقارات إن قيمتها تزيد مع الوقت والدخل حقها ثابت تقريبًا. سلبياتها إنها غير سائلة، يعني صعب تبيعها وإن اضطريت تبيعها بسرعة بتخسر فيها كثير.
صناديق الاستثمار المشتركة وصناديق المؤشرات المتداولة
سواءً استثمرت في صندوق مشترك أو صندوق مؤشر متداول، أنت تستثمر في أصول مختلفة زي الأسهم والصكوك أو السلع.
الفرق بينهم إن صندوق الاستثمار المشترك من اسمه مشترك يعني فيه ناس كثيرة داخلة تستثمر سوا وفيه مدير صندوق ياخذ القرارات الاستثمارية عنهم، ودام أنه في شخص محترف يديرها بيكون عليها رسوم مرتفعة شوي، نجي لصناديق المؤشرات المتداولة هي تشبه صناديق الاستثمار المشترك بس تختلف عنها إنها تتبع مؤشر معين في السوق ( زي مؤشر سوق الأسهم) ومالها مدير صندوق عشان كذا رسومها أقل.
منتجات الادخار
حسابات الادخار، حسابات السوق النقدي، كلها طرق تسلّف فيها البنك فلوسك مقابل عوائد على المدى القصير ومخاطر شبه معدومة. إذا جينا نقارنهم من حيث السيولة بتكون حسابات الادخار أكثر سيولة وأقل عوائد. المميز في منتجات التوفير تعتبر الأكثر أمان، والأقل عوائد.
السلع الاستهلاكية الأساسية
السلع الأساسية – هي الأشياء اللي عليها القيمة زي الذهب والمعادن والبترول والمواد الغذائية والمواشي. فيه ثلاث طرق للاستثمار في السلع. الأولى هي إنك تشتري السلع وتخليها عندك، مثلاً يكون عندك حلال أو تشتري سبايك ذهب وفضة. الطريقة الثانية إنك تشتريها بعقود آجلة، يعني تشتري السلع بسعر محدد بتاريخ مستقبلي. آخر شيء تقدر تستثمر في السلع عن طريق صندوق استثمار مشترك أو متداول.
ميزة السلع إنها تقدر تحمي محفظتك في أوقات التضخم العالي، لمّا الأصول الثانية تفقد قيمتها، السلع تزيد قيمتها. في نفس الوقت، سوق السلع عادةً يكون أكثر تذبذب من سوق الأسهم والصكوك والعملات.
العملات الرقمية (Crypto)
العملات الرقمية هي عملات مو ملموسة يتم تداولها بشكل افتراضي. مبنية بتكنولوجيا البلوك تشين وعمليات تشفير معقدة تحمي المستثمرين. العملات التقليدية تصدرها الحكومات، لكن العملات المشفرة يصنعها المبرمجين. المعاملات البنكية العادية تكون واضحة للحكومة لكن معاملات العملات الرقمية مجهولة. فيه دول نظمت التداول فيها وصار عليها رقابة وفيه دول للآن الوضع فيها مجهول!. سوق العملات الرقمية مره متذبذب ومخاطرة كثيرة. تقدر تربح بسرعة وتخسر بسرعة!
العملات الأجنبية ( FOREX)
دايم تسمع عبارات زي “الدولار طالع”، “الجنيه نازل”، أو “الين ضعيف”. العبارات هذي تبين قيمة العملات المختلفة بالنسبة لبعضها البعض، المستثمرين دايم يشترون العملة لمّا تكون رخيصة نسبيًا ويبيعونها لمّا تكون غالية عشان يحققون أرباح. سوق الفوركس من أكبر الأسواق المالية في العالم من حيث السيولة وحجم التداول العيب اللي فيه إن تذبذبه كثير ومخاطرة عالية.
الفن والمقتنيات
مو بس تقدر تستثمر في الأشياء اللي ذكرناها فوق، كمان تقدر تستثمر في أغراضك اللي تشتريها وتكون عارف إنها تنفع للاستثمار زي الساعات والمجوهرات والشنط الغالية واللوحات وغيرها كثيير.. اللي يميز سوق الفن إنه مو مرتبط بسوق الأسهم أو أي مؤشر ثاني وهذا معناه إنك مالك دخل بتقلبات السوق، تقدر تحتفظ بأغراضك لمّا تقرر تبيعها
عيبه الوحيد ممكن يكون صعب تعرف القطع اللي قيمتها بتزيد في المستقبل إلا لو كنت خبرة في المجال. ويبيلك تحتفظ فيها لسنوات، عشان تعطيك قيمة كويسة وقت البيع ولازم تحافظ عليها.
كل الأصول لها مميزات وعيوب. بس لو تبي زبدة اللي قلناه. الاستثمارات الآمنة تعطيك عوائد قليلة، والاستثمارات الخطيرة تعطيك عوائد عالية. تقدر توازن بين العوائد العالية وأمان محفظتك بتنويع استثماراتك. لو استثمرت في تشكيلة من الأصول عالية ومنخفضة المخاطر، تقدر تحمي نفسك وفي نفس الوقت تستفيد من فرص النمو. كل المستثمرين يبنون محافظهم المختلفة، بناءً على تحملهم للمخاطرة، طموحهم الاستثماري، واستراتيجيتهم الاستثمارية.
