اليوم أمك قررت إن الغداء بيكون مكرونه بشاميل بس ما لقت لحمة في الثلاجة نادتك تروح البقالة وتشتري ٢ كيلو لحم.
فيه طريقتين بتشتري فيها يا إما إنك بتاخذ 2 كيلو لحم بالسعر اللي تلقاه أو بتاخذ على قد الفلوس اللي معك بغض النظر عن الكمية. هذا بالضبط اللي يصير في سوق الأسهم!
لمّا تسوي أمر شراء بيكون عندك خيارين: “شراء بسعر السوق” أو “شراء بسعر محدد”. خلنا نشرحها لك بشكل أوضح.
الشراء بسعر السوق: الفورية أهم من السعر
إذا اخترت الشراء بسعر السوق، معناه إنك تبي تنفيذ الطلب بأسرع وقت، حتى لو تغير السعر خلال ثواني. النظام مباشرة ينفذ الطلب على أفضل سعر متاح، وهذي الطريقة غالبًا يستخدمها المستثمرين اللي يبيعون ويشترون في نفس الوقت.
مثلًا، تبي تشتري 200 سهم حالاً وكان فيه بائع عارض السهم بـ20 ريال، راح تشتري منه مباشرة. وإذا ما كان عنده كمية كفاية، يكمل النظام من نفسه تنفيذ باقي طلبك على الأسعار المتاحة، اللي ممكن تكون أقل أو أعلى. يعني ما عندك ضمان على السعر، لكن عندك ضمان إن العملية تصير فورًا وبنفس الكمية اللي تبيها.
الشراء بسعر المحدد: السعر أهم من الفورية
أما لو كنت مهتم بالسعر أكثر من الفورية واخترت الشراء بسعر محدد، في هالحالة أنت تقدر تحدد للنظام سعر معين يشتري عنده.
مثلًا، تبي تشتري سهم بسعر 10 ريال، وسعر السوق الحين 15 ريال، كل اللي عليك تقول للنظام إذا وصل السعر لـ 10 ريال نفذ الطلب. وبكذا تضمن إنه ما راح يتنفذ إلا لو وصل لـ 10 ريال أو أقل.
أمر البيع بسعر محدد
نفس الفكرة في البيع، لو عندك أسهم وتبي تبيعها بـ 20 ريال أو أكثر تحط أمر بيع بسعر محدد وما راح يتنفذ الطلب إلا لمّا يجي مشتري بالسعر اللي حددته.
طيب، وش يصير إذا ما وصل سعر السوق للسعر اللي محدده؟ يبقى الطلب معلق وما يتنفذ سواءً للبيع أو الشراء.
وبيكون عندك 3 خيارات:
الأول: صالح حتى الإلغاء
في هالحالة بيبقى الطلب موجود الين ما يتنفذ أو أنت تلغيه
الثاني: صالح حتى يوم اليوم
في هالحالة طلبك بيبقى موجود الين ينتهي يوم التداول، إلا أذا الغيته أو تنفذ
الثالث: صالح حتى تاريخ محدد
في هالحالة يبقى موجود الين تاريخ معين، أنت تحدده.
أوامر السعر المحدد عكس أوامر ما تتنفذ إلا بالسعر اللي أنت اخترته، لكن تقدر تلغيها في أي وقت.
كل خيار من اللي ذكرناها له مميزاته وعيوبه، أنت تقرر حسب ميزانيتك، واستراتيجيتك اللي ماشي عليها سواءً كنت تبي سرعة التنفيذ أو يهمك السعر.
