لو عايز تأمن مستقبلك المالي وتعمل ثروة لنفسك، الاستثمار هيكون هو الأداة المثمرة بشكل مدهش!
لكن احنا مدركين إن الاستثمار على قد ماهو مشوّق على قد ماهو شاق! علشان كدة احنا موجودين وبنقدم الدعم اللي يخليك تبدأ وتطور في عالم الاستثمار، خطوة ورا خطوة.
مع خطة ذكية وشوية معلومات، هتقدر تحط نفسك على طريق النجاح للمدى الطويل.
وهنا بيجي دور القواعد الـ7 للاستثمار.
من أول أهمية انك تبدأ بالدفع لنفسك أولاً وتمشي على ميزانية مظبوطة، لحد انك تعمل صندوق للطوارئ وتنوّع في استثماراتك، المبادئ دي بتوفرلك كل اللي محتاجه عشان تستكشف عالم الاستثمار.
فماتخافش انك تدخل في الموضوع أكتر وتتعلم تفاصيله، طالما معاك الأدوات والعقلية السليمة فالاستثمار هيكون ممتع، وكأنه رحلة من المكافأت على الأستقرار المالي والنمو اللي بتحققه.
تعالى نبدأ بأول قاعدة أساسية للاستثمار:
القاعدة الأولى: ادفع لنفسك الأول
قبل ما تدخل في الاستثمار مهم تبقى عارف أن أهم استثمار تعمله هو الاستثمار في نفسك.
لو فكرت في الموضوع بالطريقة دي: هتلاقي إنك لما بتأكل نفسك في مطعم برة، فأنت بتدفع تكلفة الأكل زائد الخدمة والتجربة نفسها، نفس الموضوع لما بتشتري هدوم من ماركة معينة ، بتدفع للخامات والتصميم نفسه، في الحالتين انت بتستثمر في الحصول على قيمة لحظية، أو للوقت الحاضر.
ادفع لنفسك الأول معناها أنك بتخصص جزء من فلوسك للاستثمارات اللي هترجع ليك في صورة فلوس أكبر على المدى الطويل. الفكرة تشبه أنك بتعمل لنفسك مرتب (أو مصروف) شهري، بس ده مصروف بيفضل يكبر ويتضاعف كل ما تاخد قرارات مالية ذكية.
وكقاعدة متجربة، بمجرد ما تستلم دخلك الثابت وتشيل 20% على الأقل منه وتحطهم في استثمارات، فأنت كدة بتعمل أولوية لسلامتك المالية! وكده بتطمن وتتأكد أن عندك أساس قوي للنمو المستقبلي والاستقرار.
القاعدة التانية: اعمل ميزانية
لما الموضوع يكون إدارة وتنظيم الفلوس، يبقى ضروري جداً تكون ماشي على خطة بتضمنلك أنك بتحقق أقصى إستفاده من دخلك، وده اللي قاعدة 50-30-20 بتحققهولك بكل سهولة.
القاعدة بتنصحك إنك تثبت 50% من الدخل الشهر على للنفقات الأساسية: زي الإيجار، والبقالة، والمواصلات. وـ30% تحطهم في الحاجات اللي مش أساسية للحياة: زي التسوق، والأكل برة البيت. إنما بقى الـ20% الباقية فدي اللي هتشيلها بعيد عن إيدك وتحطها في استثمارات.
وزي ما النسب دي تقدر تكون دليل فعّال بشكل كبير، زي ما لازم ناخد في عين الاعتبار أن الوضع المالي لكل واحد مننا مختلف عن غيره؛ يعني مثلاً لو أنت عليك دين/ديون فممكن تكون أولوياتك هي تسديد الديون دي. وعلى الجانب التاني، لو وضعك المالي مستقر، ممكن تختار إنك تخصص جزء أكبر من من دخلك وتحطه في استثمارات أكتر عشان تحققلك النمو بمرور الوقت.
في النهاية، المهم إنك تلاقي الطريقة اللي تحققلك التوازن، وتكون مدرك لأولوياتك، علشان لما بتكون أنت المتحكم في مستقبلك المالي بتقدر توصل للنجاح المالي على المدى الطويل.
استخدم أداة عمل الميزانية من ثاندر علشان هتساعدك تتابع نفقاتك بسهولة.
القاعدة التالتة: سدد ديونك
لو عايز تشوف فلوسك بتكبر، لازم تتخلص من العقبات اللي في طريقك، وواحدة من أهم العقبات اللي بتسد عليك الطريق للنجاح المالي: هي الديون!
الديون ممكن تاخد أشكال كتير، زي قرض من البنك، أو قسط عربية، مش المهم ايه مصدر الدين، المهم فعلاً هو أنك عليك دين بيحط عبء على فلوسك.
وكل ما طوّلت مدة سداد الدين كل ما بتلاقي نفسك متداين بمبلغ أكبر، بسبب الفايدة والرسوم.
الموضوع ده بيصعب فكرة أنك تحقق تقدم ناحية أهدافك المالية، علشان كدة ضروري جداً انك تشتغل على التخلص من الديون دي
بشكل مباشر، وتحولهم لصفر في أقرب وقت ممكن.
أقرا مقالة 3 طرق للتخلص من الديون علشان تساعدك تحط خطة تخلصك من الديون بأفضل طريقة مناسبة ليك.
القاعدة الرابعة: اعمل صندوق الحلول
وانت شغال على تنظيم ميزانيتك، ضروري تعمل حساب أي أحداث غير متوقعة، لأن الحياة مش دايماً بتمشي بالورقة والقلم!
يعني أي طوارئ زي تصليحات في عربيتك، أو أي إجراءات طبية، أو حتى تغيير وظيفة مفاجئ، كل دي ظروف صعب التنبؤ بيها وسهل تأثر على استقرارنا المادي.
وعشان تحمي نفسك من أحداث زي دي، هتلاقي فكرة صندوق الحلول كويسة وفعالة جداً، لأنه بيمثل إحتياطي من الكاش اللي تقدر ترجعله في أي وقت. وفكرته ببساطة إنه يقدر يوفي احتياجاتك الأساسية للحياة لمدة من 6-12 شهر.
ولما بتقدر تحقق وجوده في حياتك بيوفرلك شيء من راحة البال والإحساس بالأمان، لأنك بتكون عارف أن عندك سند من الفلوس تقدر ترجعله في أي وقت صعب. فمتنساش وانت بتشتغل على تحسين وضعك المالي في المستقبل وتنظيم ميزانيتك، انك كمان تخلي صندوق الحلول موجود على جمب في حالة أن الحياة قررت تعمل أي مفاجئات.
القاعدة الخامسة: ابدأ بدري تاخد أقصى إستفاده
الاستثمار مفيهوش حاجة اسمها: لسة بدري. حتى الاستثمارات الصغيرة لما بتتعمل بدري بتجيبلك أرباح كبيرة على المدى الطويل، والفضل في ده يرجع للفايدة المركبة!
فلنفترض أنك النهاردة عندك 20 سنة، وقررت تشغل 100 جنيه من فلوسك في صندوق استثمار له متوسط عائد سنوي 8%. لو فضلت تحط 100 جنيه كل شهر على مدار الـ40 سنة الجايين، هيبقى حجم اللي صرفته 48,000 جنيه، واللي كسبته 237,000 جنيه، فهنا هنشكر الفايدة المركبة تاني!
وفي الناحية التانية، لو استنيت لحد ما يكون سنك 30 عشان تبدأ بقى تدخل عالم الاستثمار، واستثمرت نفس الـ100 جنيه، فهتبقى صرفت على مدار الـ40 سنة 48,000 جنيه برضه ، لكن اللي هتكسبه هيكون 163,000 جنيه، فرق حوالي 73,000 جنيه، شوفت الفايدة المركبة بتعمل ايه!
الأمثلة دي بتصورلك ازاي البداية بدري ممكن تعمل فرق كبير يأثر على مستقبلك المالي بشكل قوي، فكل ما تبدأ استثمارك بدري كل ما فلوسك يبقى عندها وقت أطول تكبر وتتضاعف فيه. خليك أنت المتحكم في وضعك المالي في المستقبل وابدأ من النهاردة تكبر ثمار الاستثمار على المدى الطويل.
القاعدة السادسة: اعمل استثمارات متنوعة
من أكتر الأساليب المؤثرة على استثماراتك هي إدارة الـrisk أو المخاطرة في محفظتك الاستثمارية، وهو عبارة عن تنويع الاستثمارات ، بمعنى انك ماتحطش كل فلوسك في أسهم قطاع واحد أو في نفس الصناعة، توزيع فلوسك على قطاعات متنوعة هو الأفضل دايماً.
يعني مثلاً ممكن تختار انك تستثمر في تشكيلة من الأسهم ضمن قطاعات كتير، زي التكنولوجيا، والرعاية الصحية، والمالية. ده بيساعد في انك تحمي محفظتك في حالة لو في قطاع معين حصله انخفاض مفاجئ، لأن القطاع التاني ممكن يبقى عامل أداء كويس.
وبكده لما تنوع في أنواع استثماراتك، تقدر توزع المخاطرة على محفظتك الاستثمارية مع بعضها، فتقدر تزود فرصك للنجاح المالي.
فلو انت بتدور على طريقة تعمل بيها محفظة استثمارية قوية ماتساش أهمية التنويع في اختيار الاستثمارات، الموضوع بسيط لكن له تأثير كبير على إدارة المخاطرة وحماية ثروتك على المدى الطويل.
أقرا مقال ما هو التنويع واعرف ازاي ده بيفيد استثماراتك.
القاعدة السابعة: افهم انت بتستثمر في ايه
من أهم مفاتيح الاستثمار الناجح: انك تكون متأكد انك فاهم انت بتحط فلوسك في ايه.
والكلام ده مش معناه انك محتاج تكون خبير اقتصادي عشان تشغل فلوسك، كل المقصود بيه انك تحط وقت تعمل فيه الأبحاث اللازمة اللي تخليك تفهم بشكل كافي ايه المخاطر والمكاسب المحتملة للاستثمار ده. انت عارف ايه الفرق بين السهم وصندوق الاستثمار؟ طب سمعت عن الـETF او صناديق المؤشرات؟ماتخافش من السؤال أو طلب مصادر تساعدك تاخد قرار مبني على معرفة، لأن كل ما بتزود معلوماتك وتعرف أكتر عن الاستثمار كل ما بتكتسب ثقة أكبر في اختياراتك المالية والدافع منها.
هتلاقي عشرات المقالات على الموقع ده بتشرحلك ببساطة كل حاجة عن الفلوس والاستثمار.
