الاستثمار في البورصة وسيلة رائعة علشان تبني ثروة ويبقى عندك إستقلال مالي. بس يعني إيه البورصة وبتشتغل إزاي؟
مع كل الأرقام والرسومات البيانية، ممكن تحس بالخوف، فخلينا نبسطها.
يعني إيه سهم؟
تخيل إن الشركة زي بيتزا، واتقطعت لشرائح كتير. صاحب الشركة عايز يجمع فلوس، فيبيع كام شريحة في السوق، ويحتفظ بالأغلبية لنفسه. لو اشتريت شريحة، ده معناه إنك بتملك جزء من البيتزا. لو سعر البيتزا زاد، سعر الشريحة بتاعتك هيزيد، وتقدر تبيعها بسعر أعلى من اللي اشتريتها بيه. في المثال ده، الشرائح بتمثل الأسهم، والبيتزا الكاملة بتمثل الشركة، والسوق بيمثل – صح، البورصة.
يعني إيه البورصة؟
البورصة هي ببساطة مجموعة من الناس بتشتري وتبيع أجزاء صغيرة من الشركات على حسب توقعاتهم لقيمتها في المستقبل. كل بلد عندها مؤشر في البورصة، والمؤشرات دي بتقيس مجموعة من أسعار الأسهم وتجمعها في رقم واحد زي درجة. يعني المؤشرات دي زي لوحات النتايج في البورصة. لو عايز تعرف البورصة ماشية إزاي، تابع اللي بيحصل في المؤشر بتاعها.
يعني إيه طرح عام أولي (IPO)؟
دلوقتي بعد ما فهمنا الأساسيات، خلينا نتكلم عن مفهوم تاني. في البورصة، في شركات بقالها سنين بتبيع أسهمها هناك. ممكن تشتري سهم تم شراؤه وبيعه مرات كتير قبل كده – بنسمي ده السوق الثانوي. السوق الأساسي هو المكان اللي بيتم فيه تداول الأسهم الجديدة لأول مرة. وده اللي بنسميه الطرح العام الأولي (IPO).
إيه اللي بيحرك قيمة السهم؟
أسعار الأسهم بتتحدد حسب العرض والطلب في السوق. لو في ناس كتير عايزة تشتري سهم (طلب) أكتر من اللي عايزين يبيعوه (عرض)، السعر بيزيد. من ناحية تانية، لو في ناس أكتر عايزة تبيع سهم عن اللي عايزين يشتروه، العرض هيبقى أكبر من الطلب، والسعر هينخفض.
فهم العرض والطلب سهل. اللي أصعب هو تفهم ليه الناس بتحب سهم معين وبتكره سهم تاني. السوق في النهاية هو انعكاس لقيمة الشركات والصناعات في المجتمع. وكبشر، نظرتنا للقيمة بتتغير باستمرار. ده بيعتمد على تحديد إيه الأخبار اللي إيجابية للشركة وإيه الأخبار اللي سلبية. العوامل اللي بتأثر على أسعار الأسهم بتقع تحت مجموعة من الفئات، زي:
- أخبار وأداء الشركة
- أداء الصناعة
- مشاعر المستثمرين
- العوامل الاقتصادية
![](https://thndr.app/learn/storage/sites/6/2022/06/Thndr_Learn_InArticle_Stock.jpg)
رغم إن البورصة ممكن يكون ليها تقلبات على المدى القصير، الاستثمار هو وسيلة رائعة لبناء الثروة على المدى الطويل. اتأكد إنك بتستثمر بذكاء وباستراتيجية تتناسب مع أهدافك المالية، وخليك مركز على أهدافك الطويلة الأجل عشان تتجنب اتخاذ قرارات مبنية على خوف قصير المدى.