الاستثمار في صندوق استثمار عامل زي شراء برجر جاهز من قبل كده بكل مكوناته المختلفة. والمكونات المختلفة دي بتمثل أنواع مختلفة من الأوراق المالية. وكمان فكرة ان البرجر كان جاهز من قبل كده بيوضح ان صندوق الاستثمار كان متجهز من قبل كده من خلال متخصصين
مفهوم صناديق الاستثمار بسيط. هي عبارة عن مجموعة من الأموال بيديرها مدير أصول هدفه الوحيد هو تنفيذ أفضل استراتيجية استثمار لمساعدتك انك تحقق أكبر قدر ممكن من الأرباح. هم بيكونوا ملزمين قانونًيا انهم يشتغلوا لمصلحة المستثمرين. صناديق الاستثمار تعتبر استثمار جماعي مع مستثمرين تانيين. صناديق الاستثمار بتدي المستثمر الاختيار انه يستثمر في مجموعة من الأصول أو الأوراق المالية المختلفة زي الأسهم والسندات
عشان صناديق الاستثمار بيديرها متخصصين، فبيكون في رسوم اشتراك للانضمام لصندوق استثمار. صناديق الاستثمار بيكون عندها مخاطر مختلفة وعائد مختلف حسب الحاجات اللي بتستثمر فيها، زي مثلا الآسهم والسندات. ممكن صندوق استثمار قليل المخاطر يستثمر في سندات والعكس صحيح، لو صندوق عالي المخاطر هيستثمر في الآسهم. المعلومات دي كلها بتكون موجودة في نشرة الإصدار بتاعة الصندوق. النشرة دي بتكون وثيقة رسمية بتشرح أهداف الصندوق وازاي بيشتغل. ممكن تلاقي نشرة الإصدار على موقع مدير الصندوق.
ازاي تشتري في صندوق استثمار؟
تسعير صندوق الاستثمار
خلينا نقول انك عايز تبدء في الاستثمار في صندوق، ازاي تحدد السعر المناسب؟ سعر صندوق الاستثمار بيتحدد من خلال أداء الأوراق المالية الي انت عايز تستثمر فيها. لما تشتري حصة في أي صندوق استثمار، فأنت بتشتري الأداء ده واللي بيمثل جزء من قيمة المحفظة
سعر الحصة في صندوق استثمار اسمه صافي قيمة الأصول او الNAV. ايه؟ خلينا نشرحلك اكتر. تخيل انك عايز تعمل طبق بطاطس مقلية. ساعتها هتحتاج شوية مكونات من ضمنهم بطاطس وكاتشاب وزيت وتوابل. فلو قررت افتراضيًا انك تبيع صوباع بطاطس واحد ساعتها هتقسم التكلفة الإجمالية للمكونات على عدد البطاطس المقلية اللي هتبيعها.
نفس الحاجة تنطبق علي تسعير وحدة الصندوق أو الNAV. هي ببساطة سعر السوق بتاع الأسهم المختارة على إجمالي عدد الوحدات / الأسهم. عادةً بيتم تسوية صافي قيمة الأصول في نهاية يوم التداول ومش بيتغير كتير على مدار اليوم. ومع ذلك، ممكن يتغير كل يوم مع التغيرات في أسعار الأسهم المختارة.
الاكتتاب والاسترداد
ممكن كل قد ايه تكتتب (تشترك) في صندوق الاستثمار؟ طيب، هو مش اشتراك نيتفليكس، هو ببساطة نوع مختلف من الاشتراكات. في لغة التمويل، معناها عدد المرات اللي ممكن فيها شخص يشتري حصة في صندوق الاستثمار، وده بيختلف مع اختلاف الصندوق.
نفس الحاجة تنطبق علي الاسترداد من صندوق الاستثمار. وده ببساطة عملية سحب فلوسك من الصندوق، وبتختلف بردو من صندوق استثمار للتاني.
ايه هي امثلة لصندوق الاستثمار؟
زي ما قلنا قبل كده، كل صندوق استثمار بيستثمر في منتجات استثمارية مختلفة، وده معناه ان كل صندوق ليه مخاطر وعائد مختلف
مخاطرة وعائد عالي
صندوق AZ فرص
CI30: صندوق مصر اكويتي
مخاطرة وعائد قليل
صندوق AZ ادخار
